ගිනිගත යෞවනය

ගිනිගත්  යෞවනය

                   මදකට හැරී බලන්න යෞවන සමය පුද්ගලයකුගේ ජීවිතයේ සොදුරුතම අවධිය නොවන්නේද? යෞවනය සමය සැහැල්ලුවෙන් සතුටින් විනෝදයෙන් ගත කළ යුත්තක් විනා ජීවිතය විදිනු මිස විදවන්නක් බවට පත්කරගත යුතු වන්නේ නැත. වර්තමාන තාරුණ්‍යය දෙස බැලූ කළ ඔවුන් කෙතරම් අවිචාරවත් ලෙස තාරුණ්‍යය විනාශ කර ගන්නවාද යන්නට ඕනෑතරම් සාධක තිබේ. මත්ද්‍රව්‍ය භාවිතයට ඇබ්බැහිවන තරුණයන් තම ජීවිතය විනාශ කොට ගනී. පවතින සෝචනීය තත්වය නම් පාසල් සිසිහු පවා මත් රකුසාට බිලිවීමයි.  මත්ද්‍රව්‍යයට ඇබ්බැහිවූවන් පොළවේ පය ගසා ජීවත් වෙනු වෙනුවට ඔවුන්ගේ සිතින් මවාගත් සිහින ලෝකයන්හි ජීවත් වෙයි. මත්වූවන් නිසාවෙන් සමාජය තුළ මාර්ග අනතුරු, සොරුන්, මංකොල්ලකරුවන්, ස්ත්‍රී දූෂකයන් වැනි සමාජය පිළිකුල් කරන පුද්ගලයන්ගේ වර්ධනයක් ඇත. " මත්ද්‍රව්‍ය භාවිතය හා දුම්බීම ඔබේ ශරීරයට අහිතකරය" යන දැන්වීම පවා නොතැකීම සෝචනීය තත්වයකි. මත්ද්‍රව්‍ය භාවිතා කරන තාරුණ්‍යය සාමාජීය, දේශපාලනික, ආර්ථික, අධ්‍යාපනික යන සෑම අංශයකින්ම පිරිහීමට ලක් වේ. වර්තමාන තාරුණ්‍යය මත් රකුසාට බිළි වී හමාරය. ජීවිතයේ නිශ්චිත අරමුණු, බලාපොරොත්තු රහිත තරුණයන් ගතලන ඩෙනිම, ටී ෂර්ට් එක, පයලන සෙරෙප්පු දෙකින්, අතැතිව ඇති නවීන ජංගම දුරකතනයෙන් හා දල්වාගත් සිගැරැට්ටුවෙන් සමාජය ඉදිරියේ තම ප්‍රතිරූපය ප්‍රදර්ශනය කිරීමට යෑම හාස්‍යයට කරුනක් නොවන්නේද? තරුණයන් තරුණියන්ගේ ආකර්ෂණය දිනා ගැනීමට  වර්ණ ගනවන ලද හිසකෙස් හා කොටන ලද පච්චයන් ප්‍රදර්ශනය කිරීම ඔවුන්ගේ ජීවිතයේ ඇති හිස් බව කියාපාන්නා වූ කැඩපතක් වැනිය. ලැබූ ජීවිතය විදිය යුතු බව සැබෑය . නමුදු ජීවිතය විදිය යුත්තේ ජීවිතයට අහිතකර දෑ ලංකොටගෙන නොවේ. තාරුණ්‍යය සිහියේ තබා ගත යුත්තේ තරුණ අවධිය යෞවන සමය  ජීවිතයට එනු ලබන එක් අවධියක් වන බවත් එහිදී කරණු ලබන දෑ මත තම ජීවිත කාලයම තීරණය වන බව නොවේද?